 |
| Ist |
Garda.id | Tuk Lenga Mentawis
1.
Asmarandana
Tuking lenga terus mili,
Mrembes ing perenging arga,
Gunung Kendheng kulon wetan,
Sumber suku gunung renteng,
Padhangan Ngepeh Temayang,
Montong Jenu Bancar Widang,
Jepon Bradag Randublatung, Winengku Tirtakusuma.
2.
Mijil
Ratu Kencana Kudus dumugi,
Singapura kantor,
Punjer dagang Malaka Temasek,
Sade lenga ing manca negari,
Wanci nemu bathi,
Dhuwit tumpa tumpuk.
3.
Pucung
Kehing petung rega lenga dadi kedhung,
Kandel arta praja,
ingaranan minyak bumi,
Sung sesumbang peprentahan padhang jingglang.
4.
Gambuh
Pakaryan lembar lembur,
Muncar mancur saking bawah dhuwur,
Jroning siti tuking lisah minyak bumi,
Swara saur ndhudhuk sumur,
Siyaga juru pangebor.
5.
Kinanthi
Dhuwit minyak gya lumebu,
Pinandhegan para bankir,
Minangka dana nagara,
Kanggo upah saben sasi,
Prabeya pra abdi garap,
Sentana mantri pangarsi.
6.
Megatruh
Tutur jantur minyak bumi gawe makmur,
Lisah lenga pereng giri,
Langgeng sumirat sumembur,
Kanan kering kayu jati,
Sumbering bandha kedhaton.
7.
Sinom
Urute kali bengawan,
Kinapit perenging hardi,
Dhudhuk dhudhah tuking lenga,
Pari gaga angrenggani,
Rasane enak gurih,
Mangungkung peksi perkutut,
Artane lisah turah,
Ratu Kencana nguningani,
Nara praja kinen ambangun negara.
8.
Dhandhanggula
Kudu titis amrih tambah manis,
Nggulawenthah minyak bumi lisah,
Cerak bengawan sisih ler,
Tuking lenga kadulu,
Mbrebes mili sumurat keli,
Lampah sakmarga marga,
Anyumber sumur bur,
Daya kuwat pasar jagat,
Wus lumaris among dagang laris gelis,
Gedhong bandha lumaksa.
9.
Maskumambang
Manah pikir olah kridhaning pra bankir,
Sumimpen emas batangan,
Gemi nastiti ing dhuwit,
Dagang lancar pasar gangsar.
Trus lumaris sasana hartaka picis,
Saking Kudus Kartasura,
Ratu Kencana murwani,
Kaloka bandha lumaksa.
10.
Gambuh
Bank Mataram binangun,
Kebak purun narendra Sinuwun,
Kanjeng Sunan Paku Buwana kaping Dwi,
Pitulas papat nem tahun,
Hadeging hartaka gedhong.
Panjang punjung ngrembuyung,
Pasir wukir karya Kudus agung,
Tata titi gemah ripah loh jinawi,
Cekap cukup subur makmur,
Amiwiti papan gedhong.
11.
Kinanthi
Pirantine dol tinuku,
Liru pernah emas picis,
Kapyarsa pasar ngumandhang,
Swaraning dhuwit kumrincing,
Sigrak gumyak candhak kulak,
Upakarti saknegari.
Bandha lumaksa binangun,
Sunan Amangkurat Jawi,
Piranti wadhah hartaka,
Raja brana emas picis,
Gagasan Ratu Kencana,
Wulangan gemi nastiti.
12.
Pucung
Wus jinurung dol tinuku turut lurung,
Tapak penak jenak,
Gya umili asil bumi,
Trus warata barang karya pra kawula.
Dagang laku laras laris Kudus payu,
Among dagang pasar,
Suku pabrik bahu dhuwik,
Tambah turah hartaka kasil ingarah.
13.
Asmarandana
Amarsudi kehing bathi,
Gemah lampahing bakulan,
Ripah bangun griya rame,
Loh subuh kehing tanduran,
Jinawi murah kang tinumbas,
Bale bank minangka lumbung,
Wadhah gedhe papan arta.
Kutha desa wana ardi,
Mejobo suka lelana,
Sregep Jati Bae Dawe,
Taberi Kota Undaan,
Jekulo sigrak kekulak,
Trus lumaku Kaliwungu,
Pangarsa sana hartaka.
14.
Megatruh
Agul agul lambang priyayi pinunjul,
Kajen keringan pinilih,
Katut kerut mas jumerut,
Memanis ulaping picis,
Gya tinata bank kedhaton.
Bandha bandhu winangun aneng Delanggu,
Nggulung emas nglempit dhuwit,
Juragan Kudus ambrewu,
Pasar lancar bakul laris,
Bathi tikel nut wewaton.
15.
Durma
Budi daya wujud tatanan negara,
Sambang sambunging urip,
Sarana hartaka,
Basuki raharja,
Binangun bank Mataram,
Ngati ati dedeleh dhuwit,
Primpen rumeksa,
Wasis cathetan tulis.
Pabrik dhedhaharan maneka warna,
Busana endah adi,
Kayu jamu dluwang,
Perunggu wesi waja,
Sandhal japit terumpah kulit,
Tangkar warata,
Kudus terang nelahi.
16.
Pangkur
Wewangunan bank Mataram,
Kulak warta adol rungu nagri Swiss,
Nahanta Kanjeng Sinuwun,
Lelana tanah Eropa,
Aleliru jangkah manah trus meguru,
Madeg sasana hartaka,
Rumeksa para winasis.
Juru pambelah layaran,
Mandar Banjar Ambon Makassar Bugis,
Wusnya yasa pabrik prahu,
Jala mina samudra,
Kanjeng Ratu Kencana Kudus lelaju,
Tanjung perak Tanjung emas,
Malaka manca negari.
17.
Mijil
Pasinaon kawruh sumimpening dhuwit,
Gumelar gumolong,
Jejeg ajeg ngasta gawa gawe,
Tata titi taliti gemi nastiti,
Pakarti pakerti,
Pekerti rahayu.
Jerman Inggris Roma Swiss Perancis,
Minangka peguron,
Nata bale arta dhuwit gedhe, irlandia Polandia Portugal itali,
Ahli pikir bankir,
Guru Ratu Kudus.
18.
Sinom
Narendra Kraton Mataram,
Sunan Paku Buwana Dwi,
Paring dhawuh pangandika,
Marang hartaka dipati,
Sagung arta winasis,
Mantri pasar dagang bakul,
Juru bandha lumaksa,
Rumeksa dhuwit mas pucis,
Pinercaya balung sungsuming negara.
Wignya guna daya arta,
Tatas titis emas picis,
Sasana bandha lumaksa,
Penggalih gemi nastiti,
Rigen mugen taberi,
Pangageng hartaka Kudus,
Gancaring among dagang,
Dol tinuku siyang ratri,
Bankir nyata bahu sukuning panyipta.
19.
Dhandhanggula
Atur aris kinarya memanis,
Sunan Amangkurat Kartasura,
Prameswari Ratu Jene,
Uninga dunung petung,
Lenging pikir bankir ingukir,
Sumimpen raja brana,
Patut inten jumrut,
Tumpuk undhung tumpa turah,
Keh priyayi sinau urip permati,
Permana ngupa arta.
Jagi sana hartaka rinukti,
Bank Mataram kutha Surakarta,
Regeng ngengreng gedhong gedhe,
Hartaka tumpa tumpuk,
Kapitayan wong saknegari,
Pasrah dhuwit priyangga,
Titip mas jumerut,
Wilujeng bandha lumaksa,
Sarwa sarwi gemi nastiti taberi,
Praja tata raharja.
20.
Kinanthi
Emas lisah jati gayut,
Tumangkaring juru bankir,
Pangembat praja Mataram,
Nata kehing dana picis,
Sinartan niyat kawignyan,
Bebrayan trus urup urip.
Purwadi,
Universitas Negeri Yogyakarta
