 |
| Ist |
Garda.id | Ketib Anom Kudus
Sinom
Ketib Anom Kudus nabda,
Adhedhasar bener adil,
Pengadilan Kartasura,
Ngurawan hakim pinilih,
Wajib pangembat nagri,
Lelandhesan wulang hukum,
Brayat bisa tumata,
Tebih saking pilih kasih,
Padha bangsa mardi manunggaling karsa.
Pitungkas para taruna,
Dimen yuwana basuki,
Becik rumeksa pusaka,
Trompet Kyai Glongsor yekti,
Warisan pra winasis,
Leluhur wilayah Kudus,
Karaton Kartasura,
Gya ngembani Prameswari,
Ratu Kencana putri Tirtakusuma,
2.
Mijil
Kyai Mutamakin Kajen Pati,
Medhar kawruh batos,
Sumebar njalari gotek kacek,
Wulangan Syekh Siti Jenar nguni,
Makripat sejati,
Ya wahdatul wujud.
Jeng Mangkurat Jawi nabda aris
Mring golongan Anshor,
Ngumandhang swaranipun terompet,
Kyai Glongsor trompet ingkang nami,
Pusaka linuwih,
Mrih rukun rahayu.
3.
Gambuh
Ampuh paring pituduh,
Bagus alus Ketib Anom Kudus,
Mesu budi asung wejangan premati,
Yogi jejering penghulu,
Glongsor golongane Anshor.
Anshor teges tetulung,
Golong gilig sambang sambung srawung,
Adipati Ngurawan hakim negari,
Tinanggenah ngreksa hukum,
Binarung terompet Glongsor.
4.
Pangkur
Nihan Ketib Anom Batang,
Guru suci asma Ahmad Ripangi,
Sigra lapur unjuk atur,
Dhudhuk seleh sarengat,
Perlu tutur datan pareng ngawar ngawur,
Minta pengadilan praja,
Hakim Ngurawan ngatasi.
Sabdane Ratu Kencana,
Prameswari nata ing Mentawis,
Trompet Glongsor kutha Kudus,
Kinen swara ngumandhang,
Kersa guyub pusaka kinarya ngiyub,
Pinandhegan surenggama,
Ketib Anom Mutamakin.
5.
Maskumambang
Pekalongan Batang Kendal myang Semawis,
Pendherek ahli sarengat,
Mijil Samudra Pasai,
Nurdin Raniri kawentar.
Ketib Anom Batang Ki Ahmad Ripangi,
Prapteng Kraton Kartasura,
Santri Anshor ing pesisir,
Ahli syariat makrifat.
6
Megatruh
Ramya kehing siswa nggennya gugat hukum,
Gendra caking ngelmu jati,
Sisib sembir nyebal kawruh,
Sarining kitab ilahi,
Getering murid peguron.
Wus ingutus Kanjeng Ketib Anom Kudus,
Pekalongan Kyai Pati,
Rembugan majelis agung,
Trompet Kyai Glongsor muni,
Anut dhawuhe Sang Katong.
7.
Asmarandana
Adhedhasar kitab suci,
Dalil kadis saha ijmak,
Manah pekerti sumendhe,
Kawibawan kawidadan,
Tatag tutug wicaksana,
Kanjeng Ketib Anom Kudus,
Ngeman guyubing bebrayan.
Sunan Paku Buwana Dwi,
Jumenengan narendra,
Pusaka Glongsor ginawe,
Mangungkung munya ngumandhang,
Sinusul gamelan monggang,
Bendhe beri puksur tambur,
Kakandha klebat bandhera.
8.
Durma
Purna pernah hakim negara makarya,
Ngati ati patitis,
Manah jiwa permana,
Cukup sangu kawignyan,
Sarjana winasis ngalami,
Srawung bebrayan,
Kaca tepa palupi.
Sigra bidhal boyong ageng dhatulaya,
Abdi dalem prajurit,
Sentana pangarsa,
Jejel riyel kawula,
Kyai Glongsor munya rumiyin,
Mangka pratandha,
Tata cara miwiti.
9
Pucung
Lancar lulus gancar Ketib Anom Kudus,
Dipati Ngurawan,
Mutus perkara wigati,
Pengadilan Kartasura gya kuncara.
Tangguh ampuh panolaking barang kewuh,
Rahayu widada,
Kyai Glongsor den pepetri,
Bagya mulya saindhenging jagad raya.
10.
Dhandhanggula
Golongane Anshor amarsudi,
Trap trapaning sarengat makripat,
Jejeging perkara prapteng,
Saking wilayah Kudus,
Adipati Ngurawan hakim,
Lampahing pengadilan,
Mapan nuting hukum,
Jroning praja Kartasura,
Malih pulih karana penggalih lilih,
Surenggama nglenggana.
Kawula Pakasa sung bekti,
Suwita Karaton Surakarta,
Mapan ana dhusun Rendeng,
Ing Kabupaten Kudus,
Kyai Glongsor lenggah lestari,
Hangrengga upacara,
Donga puji kabul,
Jangka jangkah kasembadan,
Pangastuti lembaran wulang agami,
Bebantu nusantara.
11.
Kinanthi
Caos atur suka sukur,
Mersudi budaya Jawi,
Kyai Glongsor wus kapernah,
Minangka pusaka inggil,
Saraya setya rumeksa,
Pakasa Kudus sesanti.
Kanjeng Ketib Anom Kudus,
Priyayi conto prayogi,
Mangka pangarsa utama,
Jeng Prana Kusumajati,
Sung wewarah putra wayah,
Mulya widada lestari.
Purwadi,
Universitas Negeri Yogyakarta.rel
