 |
| Ilustrasi |
Garda.id | Gapura Notobroto
1.
Dhandhanggula
Gapura Notobroto winarni,
Tanggal Telu Januari wulan,
Tahun rong ewu selawe,
Dene sengkalanipun,
Panca asta trusing panganti,
Minangka pesanggrahan,
Krajan Plumbon Suruh,
Jeng Yoyok Prasetyo sigra,
Amastuti pinanggih suka basuki,
Tentrem tata raharja.
2.
Mijil
Jumah Kliwon
Patut den pengeti,
Gapura miraos,
Suka lila sumarah sumendhe,
Notobroto puji pangastuti,
Manah mesu budi,
Nugraha rahayu.
3.
Gambuh
Suruh mengku sesuluh,
Tanggap tangguh tanggon teguh wutuh,
Notobroto gapura kang edi peni,
Kabudayan adi luhung,
Prabane terang sumorot.
4.
Pucung
Plumbon Suruh dhusun Krajan asung kawruh,
Laladan Semarang,
Jeng Yoyok Prasetyo ngesthi,
Notobroto gapura mulya widada.
5.
Kinanthi
Gapura winangun agung,
Notobroto sung pepeling,
Sariat mula tarikat,
Yogya nuli nyinaoni,
Hakikat ujung makripat,
Kali Serang banyu bening.
6.
Asmarandana
Katon ngegla gunung Mrapi,
Ungaran lan Telamaya,
Kendhali Sada kang rame,
Angayomi dhusun Krajan,
Plumbon Suruh ing Semarang,
Ngregemeng gunung Merbabu,
Manah mardu marditama.
7.
Durma
Kanjeng Yoyok Prasetyo mring kautaman,
Ndherek para winasis,
Gesang nenek moyang,
Leluhur paring wulang,
Notobroto gapura keksi,
Sana kayangan,
Asri milangeni.
8.
Pangkur
Ngrenggani tlatah Semarang,
Notobroto gapura tatas titis,
Plumbon kecamatan Suruh,
Krajan manggih kabagyan,
Trus binarung masyarakat gya nyengkuyung,
Minangka kaca benggala,
Rinengga tepa palupi.
9.
Megatruh
Notobroto gapura lana lelaku,
Wewangunan ngemu werdi,
Kalbu pangrungu pandulu,
Manah lantiping penggalih,
Murakabi kadang mitra.
10.
Sinom
Notobroto kang kaloka,
Gapura mangka piranti,
Susila gragyak semanak,
Caos kurmat kang lumaris,
Sabawa manis aris,
Dhusun Krajan Plumbon Suruh,
Kabupaten Semarang,
Sepuh anem kakung putri,
Sarwi bingah guyub rukun mawi warah.
11.
Maskumambang
Jeng Yoyok Prasetyo permana permati,
Notobroto sung wibawa,
Jamane kencana rukmi,
Putra wayah trah tumerah.
Jumah Kliwon,
3 Januari 2025
Dr Purwadi M.Hum
Universitas Negeri Yogyakarta
